سيد علي

Abyât

خرجت مالدّار شادّه ثنيّة لبلاد العربي٠٠٠الدّنيا مقلوبة و الشْتاء تجبد مالسماء خيطين٠٠٠غسّالة النوادر في تمبك شهر أكتوبر٠٠٠لفٌت على روحها و كبست خطوتها٠ لبلاد فارغه إتطمبر و حتّى هايشة ماإدٌور فالكياس٠
تاكسي وقفّلها وهي تشقْ في الكياس شيرة باب جديد:
ـ أختي، وين قاصدة ربّي خلّي نوصلك، راك تنفخت و تاو تمرض
ـ يعيشك أمّا هاني عدني وصلت

دخلت في وسط الزناقي متاع لسواق و عملت دورة على لحوانت إلّي مازالوا محلولين، شرات طرف بخور و جاوي و دبّوزة روح الياسمين صغيرة، كملت تعدّات سلْمت على ولد عم ممّاتها في حانوتو متاع الشوّاشين:"عم الطاهر تفكّرتني؟ بنت الصادق ولد جميلة" و كيما عادتو باسها من جبينها ومدّلها شاشيّة تلم فيها شعرها عالشْتاء٠

قصدت ربّي لقهوة حمّودة باشا، شدّت بلاصتها في البيت الدّخلانيّة و خذات كاس تاي بالبندق و قعدت تستنى٠
دريجين من زمان ودخل٠٠٠راجل عمرو فالخمسة و أربعين، حليلتو، فاخر، حرجو فالأكحل، قشرتو بيضة و عندو الريشة٠٠٠جاء ملفوف في برنوس و شاشيّة فوق راسو٠
ـ مريم؟
ـ إي سيد علي ماو؟ تظهر بصحتك أكثر فالتصاور،هكه خير، ولّى عملت رجيم؟
قعد مقابلها و طلب قهوة عربي بالزهر ناقصة سكّر٠
ـ ريت الطقس بربّي؟ على مرتين باش نبطّل ما نجيش أما قلت إنت هكٌا و بسّيف ما لقيتلي هل سويعة من زمان٠
ـ أنا أوّل نهار و وقت أعطيتهولي قتلك داكوردو، لحكاية دخْلتلي في مخّي ترينو، و ماذابيّا نفهم كيفاش وعلاش و بلأخصْ آش طالبة؟
ـ باهي نبداو بكيفاش٠٠٠ستنّى بربّي نقلّو ينقّص ملموزيكا وترتلي أعصابي، ولّى نشوفو عندوشي طرف مالوف٠إي عاد وين كنّا؟ آه في كيفاش، والله آش باش نقلّك؟ تعرف، برشه حاجات صايرة فالبلاد صايرة أمّا فالسكريتو٠٠٠ لحكاية الكلْ إلّي أنا حبّيت نعرف عليك كل شيء، إسمك، لقبّك، وين تسكن، آش تخدم، شكون تقابل، شنوما هواياتك، شنيّة خلطك، شنوّه مستواك الثّقافي، معرّس ولاّ لا، عندكش صغيرات٠٠٠لحكايات هذيكه٠
ـ إي وسامحني بربّي إنت ما عندك ما تصنع تقوم تنقّب في دوسيّات لعباد وتبربش في حياتهم؟ وزيد كان صدّقني ربّي هذا الكلْ ممنوع
ـ هو كيف تجي تشوف ياساق، أمّا ساعات تعرف حاجات يولّي التبربيش قدّامها ما يظهر شيء٠٠٠و باش مانكذبش عليك و نحكيلك كلْ شيء كيما صا ربالظبط إنجّم إنقلّك إلّي أنا ما كنتش نسخايلك هكّه٠٠٠والله عجبتني، مثقّف، رزين، نظيّف، زيد طبيب، موش شويّة معنتها، و بالعمل المرضى متاعك إلّي قابلتهم إلكل يذكروك كان بالخير، والدعاوي إلّي سمعتهم يدخلوك للجنّة ديراكات٠٠٠تي حاسيلو ما نطوّلش عليك حتّا من صوحابك و جيرانك يموتو عليك٠٠٠قالولي سيد علي راجل بحبوح و صاحب نكته، و عمرو ما قال كلمة موش في بلاصتها، وكيف حاجتك بيه تلقاه، وتنجّم تعمّل عليه٠ والله شهّاوني باش نعرفك شخصيّا٠
مانطوّلش عليك بالهدرة، أللّا لطيفة دخلت إلقلبي من قبل ما نشوفها ولّا نعرفها، وزيد نهارة إلّي تعدّيت عملت كاس تاي بحذاها فرحت بيّا هي و صباح٠
ـ داخلة لداري و ما في باليش، يا بنتي بعقلك ولّى عندك مشكلة تحب شكون يعاونك عليها؟ شنوه توّا هالتفدليك الماسط٠٠٠لا حول ولا قوّة إلّلا باللّه٠٠٠ما عنديش برشة وقت نضيعو فالخرافات الفارغة متاعك
ـ سيد علي ماتغشّش روحك، مشيت حذا إلّا لطيفة و تظيّفت حذا سميرة زاده، لحقْ متاع ربّي حبّيت نعرف شكون تصلح بيك خير٠٠٠والزّوز ما عندي مانقول فيهم، كل واحدة وزينها، تربية وأخلاق، حذاقة و عقل٠٠٠٠أمّا ماكاركش٠٠٠
سيد علي يهزْ روحو ويقوم باش يروّح٠
ـ لا ستنّى هاني باش نقلّك، تتفكّر الدّار إللّي شريتها عامين لتالي باش تردْها رستوران عربي:مدفونة، بوليس مكتّف، نجارة ونواصر بالدجاج العربي؟ تتفكّر إمّاليها قدّاش كانوا محموسين عليها وإنت إستغلّيت الفرصة وزدت سخّنت أكتافك بصوحابك فالبلديّة و المعارف متاعك باش فكّيتها فكّان؟ هذيكا دار ممّاتي و عزيزي وإلّي عشتو فيها عمري ما ننساه، ريحة لبيوت إلتوّا في خشمي٠٠٠ما نعرش لوين حبّيت نوصل كيف بديت نصقصي عليك، أمّا حاجة هزّتني إلحاجة عرفت عليك برشة هداري، بدّلت رايي عليك و مانعرفش إذا كان ليوم حبّيت نقابلك خاطر ماذابيّا نعرفك أكثر ولّا خاطرنحب نقلّك إلّي أنا في بالي بالزوز نساء إلّي ماخوهم٠٠٠نحب ناخو بثاري٠٠٠نحب إلّي إنجّم نحكي إلكل واحده حقيقة راجلها، نحب نشكي للحاكم إلّي ميسّق العرس بثنين، نحب نسترجع دار جدودي، نحب نفهم علاه٠٠٠
سيد علي مانيش دونيّة أمّا وجعتني، وضرّيت بابا وأمّي٠٠٠إنجّم ليوم قبل غدوة نرجّع إلّي عملتو فينا ثاني ومثلّث٠٠٠أمّا أنا نحب حاجة برك٠٠٠دار عزيزي ترجعلي٠٠٠

Par Lallouta